Бразилката Аманда Нунес на супериорен начин ја освои УФЦ титулата во бантам категорија и уште еднаш покажа зошто е најголемата ММА борачка во историјата.
Пред половина година Аманда ја загуби титулата од Џулиана Пења, но ноќеска во Далас ѝ се одмазди и тоа со камата.
Аманда реши да се бори во контрагарда, што ја изненади шампионката, која во текот на борбата воопшто не ѝ се закани на Бразилката.
Нунес доминираше во текот на сите пет рунди и брутално ја тепаше противничката цели 25 минути, па Пења борбата ја заврши со бројни посекотини на лицето.
На крајот Аманда победи со едногласна одлука на судиите (50-45, 50-44, 50-43), а веднаш по борбата од организаторите побара пиво кое веднаш го испи за да го прослави својот триумф.
Со тоа, 34-годишната Аманда повторно стана шампионка во две тежински категории во УФЦ. Никогаш не ја загубила титулата во перо категорија, а денес докажа дека сѐ уште е кралица во бантам категоријата и дека борбата од декември минатата година била само лош ден.
Меѓутоа, по тепачката при излегувањето од салата, навивачите останаа шокирани кога видоа дека Аманда мора да оди со помош на патерици, но според првите информации не било ништо сериозно.
Нунес сега има скор 22-5, додека Џулиана Пења 11-5.
Аманда Нунес ја победи Џулиана Пења со едногласна одлука (50-45, 50-44, 50-43).
Брендон Морено го совлада Каи Кара-Франс со технички нокаут (3. коло, 3:34).
Сергеј Павлович го победи Дерик Луис со технички нокаут (1. коло, 0:55).
Алешандре Пантожа го победи Алекс Перес со гушење (1. коло, 1:31).
Магомед Анкалајев го победи Ентони Смит со технички нокаут (2. коло, 3:09).
