Аманда Горман најмногу внимание привлече со нејзиното рецитирање на инаугурацијата на американскиот претседател Џо Бајден, а сега стана првата поетеса на насловната страница на Vogue.
Познатата фотографка Ени Лебовиц за мајското издание на магазинот ја фотографираше 23-годишната Горман облечена во облека дизајнирана од Вирџил Абло, првиот Афроамериканец на позицијата уметнички директор на модната куќа Louis Vuitton.
„Првата поетеса на насловната на Vogue, вечно ќе сум благодарна и не очекувам дека ќе бидам последна - бидејќи што е поезијата, ако не е убавина?“, напиша Горман во објавата на Instagram.
Младата поетеса се прослави по емотивното читање на нејзината авторска песна „The Hill We Climb“ на инаугурацијата на Бајден во јануари.
По тој настап, Горман потпиша договор со агенцијата за модели IMG, се појави на насловната на Time и имаше низа јавни настапи. Во септември ќе објави две книги, збирка поезија и сликовница за деца.
