Неверојатна сензација се случи синоќа на трката на Vitality London на 10.000 метри каде што аматерски тркач го победи легендарниот Мо Фарах во возбудлива завршница.
Во последните стотина метри по улиците на Лондон, 25-годишниот Елис Крос водеше пред Фарах, а сите очекуваа еден од најдобрите спортисти во историјата на крајот да „додаде гас“, како што правеше со години и славеше.
Сепак, човекот кој штотуку освои три светски и два олимписки златни медали на 10.000 метри не можеше да го престигне аматерот, па на крајот Елис славеше со време од 28:40, а Фарах мина низ целта 4 секунди подоцна.
39-годишниот Фарах по трката призна дека размислува да ја заврши кариерата.
„Морам да бидам искрен со вас, мислам дека тоа е тоа. Секоја чест за победата на Елис, а за да продолжам да се натпреварувам ќе мора да работам многу напорно. Ќе разговарам за сѐ со мојата сопруга, бидејќи таа најдобро ме познава. Го сакам спортот, тој ме води, но знам дека е време да ја донесам таа правилна одлука“, рече Фарах.
Победникот Крос морал да плати котизација од 37 фунти (44 евра), бидејќи не беше дел од елитна група тркачи.
„Го победив мојот идол во неговата главна дисциплина. Ме одбија за елитната група, па морав да платам котизација. Ниту името не го напишав на мојот натпреварувачки број“, изјави Крос, кој се натпреваруваше под реден број 219.
„Кога трчав, публиката навиваше за Фарах, бидејќи знаат кој е тој и не знаат кој сум јас. Јас сум само клупски тркач“, рече Елис Крос, која доби награда од 2.000 фунти за првото место.
