Првото ексклузивно интервју со Амбер Херд по судењето привлече огромно внимание, а меѓу останатото, актерката призна дека сè уште го сака бившиот сопруг.
Во вториот дел од интервјуто за NBC News, Херд проговори за нејзините чувства кон Џони Деп.
„Го сакам. Апсолутно го сакам со целото срце. Се обидував најдобро што можев нашиот длабоко нарушен однос да функционира, но не успеав“, вели Амбер.
Истакна дека нема негативни чувства кон Деп, не мисли ништо лошо за него, ниту му посакува такво нешто.
„Не му замерувам за ништо. Знам дека можеби тоа е тешко да се разбере или би можело да биде многу едноставно ако некогаш сте сакале некого. Би требало да биде едноставно“, додаде таа.
Херд се плаши дека Џони би можел повторно да ја тужи ако продолжи да зборува во јавност.
„Знам дека не сум добра жртва. Не сум симпатична, не сум совршена жртва. Но, во текот на сведочењето барав од поротата да се обиде да го види човекот во мене“, изјави таа.
Ексклузивното интервју е првото обраќање на актерката откако е должна да му исплати отштета на Џони од 15 милиони долари. Во првиот дел призна дека правела ужасни работи и има сторено многу грешки, но дека секогаш ја „зборувала вистината“.
Херд вели дека сега ќе се фокусира на одгледувањето на нејзината едногодишна ќерка.
