Вкупната вредност на 200 респиратори што САД ќе ги испратат во Русија, заедно со трошоците за испорака, изнесува 5,6 милиони долари, соопшти Американската амбасада во Москва.
Во соопштението се наведува дека САД денеска испорачале 50 висококвалитетни респиратори, како дел од првата пратка хуманитарна донација за рускиот народ во време кога се соочува со пандемија на коронавирусот.
Од Амбасадата истакнуваат дека се работи за донација од вкупно 200 респиратори произведени во САД и дека донацијата ќе биде остварена „благодарение на великодушноста на американскиот народ и иновациите во приватната индустрија“.
Вториот дел од испораката на американски вентилатори за Русија се очекува да се изведе следната недела.
Од почетокот на пандемијата, Русија има потврдени 317.554 случаи на COVID-19. Од нив, 3.099 пациенти починаа, а 92.681 оздравеа.
Во САД се регистрирани 1.604.843 заболени од коронавирусот, од кои 95.656 починаа, а 371.795 оздравеа.