Женската фудбалска репрезентација на САД ја оствари најголемата победа во историјата на светските првенства, триумфирајќи над Тајланд со резултат од огромни 13:0.
Американската селекција постојано е меѓу фаворитите на сите светски првенства, уште откако тие почнаа да се организираат во женска конкуренција. А овојпат, актуелната генерација на американски фудбалери реши да ја покаже својата доминација и му нанесе огромен пораз на националниот тим на Тајланд.
По првото полувреме, резултатот беше „само“ 3:0 за САД, но во првите десетина минути од второто полувреме тие постигнаа уште четири гола. Потоа, во последните 16 минути од натпреварот мрежата на Тајланд се затресе уште шест пати, за да биде потврдена најголемата победа во историјата на Светските првенства.
Феноменалната Алекс Морган се запиша во листата на стрелци дури петпати, а по два гола постигнаа Роуз Лавел и Саманта Мјуис. По еден гол постигнаа Линдзи Хоран, Меган Рапино, Мелори Пју и Карли Лојд.
Претходната најголема победа на женската американска репрезентација беше забележана во 1991 година, кога победија со 7:0.
