Вашингтон, 11 мај 2018 (МИА) - Американски конгресмени од редовите на демократите објавија 3.500 реклами од Facebook, кои ги направила или промовирала руската компанија Агенција за истражување на интернетот.
Со таквиот потег најубедливо досега го прикажале обидот на Русија да предизвика расни и политички поделби во САД пред и по изборите во 2016 година.
Поголемиот дел од тие реклами изнесуваат аргументи за или против имиграцијата, правата на припадниците на ЛГБТ заедницата, правата на носење оружје и други прашања, а во повеќето од нив е присутен обид да се поттикнат расни поделби со споменување на полициската бруталност или омаловажување на меѓународното движење „Животите на црномурестите се важни“.
Некои реклами го промовираат претседателот на САД, Доналд Трамп, кој беше опозициски кандидат на претседателските избори во 2016 година, или сенаторот Берни Сандерс, кој на внатрепартиските избори во Демократската партија и беше противкандидат на Хилари Клинтон. Поддршка за неа постои само во неколку реклами.
Демократските конгресмени ги објавија рекламите кои се пласирани на Facebook во периодот од почетокот на 2015 до средината на 2017 година, но не и 80 илјади објави кои Агенцијата за истражување на интернетот, исто така, ги споделила на таа социјална мрежа.
Facebook во септември минатата година објави дека откри реклами кои предизвикуваат поделби и оти тие се платени со руски рубљи. Тие се појавуват на Facebook и во јули и во август 2017, пред самото нивно објавување. Специјалниот советник Роберт Мулер, задолжен за истрагата на руското мешање во американските избори во 2016 година и можната поврзаност на изборниот штаб на Трамп со Москва, во февруари подигна обвинение против 13 руски државјани поради учество во заговор со цел да се влијае на изборните резултати. Сите обвинети работеле за Агенцијата за истражување на интернетот, чие седиште се наоѓа во Санкт Петербург.
