Кинеската војска денеска соопшти дека забележала и придружувала американски разурнувач кој нелегално влегол во водите околу Парацелските Острови во Јужното Кинеско Море.
Во соопштението, војската наведува дека разорувачот со наведувани проектили USS Milius навлегол во територијалните води на Кина, нарушувајќи го мирот и стабилноста на прометниот воден пат.
„Нашите сили постојано ќе бидат во состојба на готовност и ќе ги преземат сите неопходни мерки за одлучно да го заштитат нашиот суверенитет и безбедност и стабилност во Јужното Кинеско Море“, изјави Тијан Џунли, портпарол на јужната команда на Кина.
Американската морнарица денеска ја оспори изјавата на кинеската војска, велејќи дека разурнувачот вршел „рутински операции“ во Јужното Кинеско Море и дека не бил избркан.
„САД ќе продолжат да летаат, пловат и оперираат секаде каде што дозволува меѓународното право“, се вели во соопштението на Седмата флота на американската морнарица.
Тензиите меѓу САД и Кина се зголемија во областа. Соединетите Американски Држави ги зајакнуваат сојузите во азиско-пацифичкиот регион со цел да се спротивстават на кинеската самоувереност во Јужното Кинеско Море и Тајванскиот теснец додека Пекинг се обидува да ги унапреди своите територијални амбиции.
