Генералниот секретар на НАТО Марк Руте денеска соопшти дека четворицата американски војници кои исчезнаа за време на воена вежба во Литванија се мртви.
Руте изјави дека сè уште не се познати деталите за несреќата.
Претставник на американската војска, кој сакаше да остане анонимен, потврди дека војниците учествуваат во воена вежба, но не го коментираше нивниот статус.
„Ова сè уште е прва информација, така што не ги знаеме деталите. Ова е навистина страшна вест и нашите мисли се со семејствата на жртвите и нивните најблиски“, рече Руте за време на посетата на Варшава.
Според соопштението на командата на американската армија за Европа и Африка, војниците во моментот на несреќата учествувале на редовна тактичка обука.
Литванската национална телевизија LRT објави дека четворица војници и едно воено возило исчезнале во вторникот попладне за време на вежба на воениот полигон „Генерал Силвестрас Жукаускас“ во Пабраде, место на помалку од десет километри од границата со Белорусија.
Литванија, заедно со Латвија и Естонија, е членка на НАТО, а односите со Русија, клучниот сојузник на Белорусија, дополнително се заладија од почетокот на војната во Украина во 2022 година.
