Американскиот „Нострадамус“ предвиде кој ќе биде следниот претседател

Познат како „Нострадамус“ по неговата способност точно да го предвиди исходот на претседателските избори во САД од 1984 година, професорот и историчар Алан Лихтман згреши само еднаш - кога републиканецот Џорџ Буш тесно го победи демократот Ал Гор во 2000 година.

Демократката Камала Харис ќе победи на претседателските избори во САД овој ноември, предвиде Лихтман.

„Камала Харис ќе биде следниот претседател на Соединетите Американски Држави – барем тоа е моето предвидување за исходот од овој натпревар“, изјави 77-годишниот старец за The New York Times.

Лихтман исто така беше меѓу оние кои ги советуваа демократите да го остават актуелниот претседател Џо Бајден да се кандидира, дури и по лошата дебата со републиканецот Доналд Трамп.

Овој американски историчар во своите предвидувања не ги зема предвид анкетите на јавното мислење - тој се потпира исклучиво на 13 прашања поврзани со партијата која моментално ја држи Белата куќа, на кои одговара со „да“ или „не“. Кандидатот кој го брани мандатот е еден од факторите што според Лихтман дава предност.

Сепак, Лихтман тврди дека Харис веќе има предност во осум од 13 критериуми што ги следи. Меѓу другото, на демократите им оди во прилог отсуството на значаен кандидат од трета страна по повлекувањето на Роберт Ф. Кенеди Помладиот, позитивните економски показатели на краток и долг рок, некои законодавни успеси на демократската администација, како и отсуството на големи социјални немири или скандали поврзани со Белата куќа.

Харис, исто така, има корист од тоа што не мораше да помине низ внатрепартиска борба за номинација, бидејќи Демократската партија брзо се собра зад неа откако Бајден се повлече од трката.

Според Лихтман, најголемата неизвесност лежи во два критериуми поврзани со надворешната политика и воените успеси или неуспеси на сегашната администрација.

„Дали работите сè уште можат да се променат? Се разбира. Не можам да предвидам што ќе се случи во светот, а имаме два променливи воени конфликти“, изјави Лихтман за Reuters.

И ако двата критериума се неповолни за Харис, Трамп би имал предност само во пет критериуми. За кандидатот на опозицијата да ја победи владејачката партија според методот на Лихтман, потребна е предност во најмалку шест критериуми.

Многу корисници на социјалната мрежа Х изразија несогласување со оценката на Лихтман за критериумите, особено во однос на позитивната оценка за економијата во време кога многу Американци го изразуваат спротивното мислење во анкетите.

Исто така, некои изразија изненадување од тврдењето за отсуство на скандал околу Белата куќа, со оглед на правната постапка против синот на претседателот, Хантер Бајден, под обвинение за даночни прекршувања и нелегално поседување оружје додека бил зависник од дрога.

Сепак, Лихтман има многу ниска стапка на грешки во неговите предвидувања. Меѓу другото, тој предвиде победа на Трамп над Хилари Клинтон во 2016 година, и покрај тоа што повеќето анкети не го покажуваа тоа. Тој исто така точно предвиде дека Трамп ќе биде тужен за време на неговиот мандат.

Професорот по историја на Американскиот универзитет во Вашингтон го предвидува исходот од претседателските избори во САД од 1984 година, а ги погоди сите освен еден - тесната победа на Џорџ Буш над Ал Гор во 2000 година, за која конечно одлучи Врховниот суд на САД.

Победа на „midterm“ изборите (изборите за Конгресот што се одржуваат на половина од претседателскиот мандат)

Без противкандидат од сопствената партија

Кандидатот е актуелниот претседател кој бара втор мандат

Нема релевантен кандидат од трета страна

Добра краткорочна состојба на економијата

Добра долгорочна состојба на економијата (барем подеднакво добра како во последните два мандата)

Големи промени во политиката

Немало поголем скандал

Немало воен неуспех во странство или дома

Имало голем воен успех во странство или дома

Немало социјални немири

Претседателот е харизматичен

Противникот на претседателот е нехаризматичен.