Американскиот Consumer Reports ги објави резултатите од најновото истражување за довербата во автомобилските брендови во САД.
Секоја година, Consumer Reports ги испитува своите членови за проблемите што ги имале со своите возила во изминатите 12 месеци. За 2020 година, тие добија одговори од околу 329.000 возачи, за автомобили направени во периодот 2000-2020 година.
Проблемите што се појавувале во врска со овие возила се класифицирани во 17 области, од помали, како што се чкрипење на сопирачките, до посериозни, како што е сервис на менувачот што не го покрива гаранцијата.
По сумирањето на резултатите, Mazda се покажа како автомобилски бренд кој ужива најголема доверба во САД, второто и третото место го заземаат Toyota и Lexus, по што следуваат Buick (бренд во сопственост на General Motors) и Honda.
Интересно е што американскиот производител на електрични автомобили, компанијата Tesla, е претпоследен според критериумот доверба на списокот со 26 брендови (Lincoln е на самиот крај на списокот).
За таквата лоша позиција најмногу придонесе најновиот автомобил на Tesla, SUV Model Y, чија сигурност е „далеку под просекот и потрошувачите никако не би можеле да им ја препорачаат на купувачите“.
Под просекот се и Model S и Model X, додека според резултатите од истражувањето единствениот што ја доби довербата на корисниците е Tesla Model 3.
