Употребата на прототипот на футуристички чамец-робот е планирано да се одвива низ околу 100 километри канали во Амстердам.
Овие целосно автономни пловни објекти би извршувале различни задачи, вклучително и превоз на патници и транспорт на смет.
Експерти од Институтот во Амстердам и научници од Институтот за технологија (МИТ) во американската држава Масачусетс работат на проектот Roboat.
Роботските чамци пловат полека, со брзина до шест километри на час, користејќи пропелер и четири придвижувачи напојувани од електрична батерија со капацитет да ги управуваат, во зависност од задачата, од 12 часа до 24 часа. Се контролираат од далечина од компјутер, врз основа на податоци од камери и сензори кои ги скенираат областите околу чамецот.
Чамците се „модуларни“ и лесно можат да се прилагодат за превоз на товар или луѓе.
Тимот кој работи на проектот вели дека ќе бидат потребни уште две до четири години за да се усоврши технологијата за автономно управување со тие пловни објекти.
Стефан ван Дијк, директор за иновации на Институтот во Амстердам, рече дека новата технологија е „многу релевантна во екстремно сложените пристанишни операции, каде има многу бродови и други пловни објекти, многу кејови и пристаништа. Безбедноста навистина може да се подобри со автономни системи, но и да ја направат работата поефикасна “.
На неодамнешните демонстрации, еден електричен чамец-робот долг четири метри, маневрираше покрај репликата на трговскиот брод од 18 век „Амстердам“, што претставуваше симболичен приказ на поморското минато и иднина на тој град.
Следува роботот да научи да маневрира низ целиот сообраќај во каналите во Амстердам, кои се полни со приватни чамци и чамци кои крстарат со туристи.
Проектот има и правен аспект и се работи на подготовка на промените неопходни за да се овозможи автономна употреба на роботски чамци, без капетани и кормилари.
Податоците собрани од камерите на тој пловен објект нема да ги идентификуваат луѓето во околината и во таа смисла ќе се гарантира приватноста на граѓаните.
