Тренерот на Реал Мадрид, Карло Анчелоти, изјави дека сака што поскоро да архивира некои неодамнешни настани поврзани со неговиот клуб и да се фокусира на натпреварот со Милан во Лигата на шампионите.
Италијанскиот стручњак прво истакна дека е тажен поради нешто што нема врска со фудбалот.
„Пред да зборуваме за било што поврзано со фудбалот, морам да истакнам дека сите во клубот се тажни. Тажни сме поради оваа катастрофа (поплавата) што ја снајде Шпанија и нејзиниот народ. Многу луѓе загинаа и тоа е нешто што сите нас нè растажува“, изјави Анчелоти на почетокот на интервјуто за медиумите.
Италијанецот не сакаше да одговори на прашањето поврзано со доделувањето на Златната топка, каде не се појави никој од Реал Мадрид, вклучувајќи го и Анчелоти, кој беше прогласен за најдобар тренер.
„Она што се случи минатата недела е веќе минато и повеќе не размислуваме за тоа.“
Следниот натпревар Реал го игра против Милан во Лигата на шампионите.
„Ова е посебен натпревар поради моето минато. Милан не почна добро, но секогаш е опасен бидејќи има голем квалитет во нападот. Имаат голем потенцијал, кој сè уште не го покажале, поради што мораме да бидеме особено внимателни“, заклучи Анчелоти.
