Италијанецот на клупта на Евертон откри дека мислел дека станува збор за шега кога беше објавен проектот за таканаречената Супер лига.
„Мојата прва реакција беше дека се зафркаваат, дека станува збор за шега! Тоа и е шега бидејќи никогаш нема да се случи. Невозможно е“, рече Анчелоти во изјава дадена за новинарите.
Тој потоа и објасни зошто таков проект во Европа нема поддршка. Проблемот е што Супер лигата е замислена по принципот на американските НБА, НХЛ, МЛБ, НФЛ и МЛС, односно затворена лига само за одредени клубови, каде резултатите не се, така многу, во прв план, но затоа заработката е огромна, а целото натпреварување повеќе наликува на шоу отколку на вистинско натпреварување.
„Спортската култура во Европа е различна од онаа во американските спортови. Не поради тоа што ние сме во право, а тие не, туку бидејќи културата на народот е различна. Во Америка, во САД, спортот е различен. Таму спортот е забава“.
„Во Европа живееме со многу поголема страст. Кога растеме, сакаме да ги победиме нашите соседи. Различно растеме. Во САД тоа не е спорт. Сега дел од фудбалот е и бизнисот, но мораме и двата да ги имаме предвид“, објаснува италијанскиот стратег.
„Фудбалот е прво спорт, а потоа со многу инвестиции, исто така станува и бизнис. Мораме сето тоа да го имаме предвид, тоа е многу нормална работа“.
Прашан дали бил загрижен поради тоа што Евертон најверојатно би бил изоставен од една таква Супер лига, Анчелоти одговори:
„Евертон е фамилијарен клуб, клуб каде може да се почувствува љубвта на навивачите. Евертон има историја на тоа да се грижи за своите навивачи многу повеќе од останатите“.
„За секој фудбалски навивач тоа беше чуден ден, изненадување. Во изминатите месеци слушавме за Супер лигата, но бев сигурен дека нема да се оствари. Што да кажам? Тие погрешија. Овие 12 клубови не беа во право. Не го зедоа предвид мислењето на играчите, тренерите или навивачите“, заврши Анчелоти.
