Анџелина Џоли во ново интервју изјави дека не верува оти годините ќе влијаат на нејзината актерска кариера.
Оваа година познатата актерка ја имаше главната улога во биографскиот филм Maria за оперската дива Марија Калас, за кој некои веќе ѝ предвидуваат номинација за Оскар.
Maria е третиот филм од серијата биографски филмови на чилеанскиот режисер Пабло Лараин. Претходните два филма, Jackie со Натали Портман и Spencer со Кристен Стјуарт, ги истражуваа животите на Џеки Кенеди и принцезата Дијана.
Како што објави Deadline, Џоли изјавила за The Sunday Times: „Како стареам, добивам сè подобри улоги. Не размислувам за тоа во смисла на квалитетот на улогите што ги добивам, туку на количината на животно искуство со кои придонесувам во проектот“.
Џоли оваа година наполни 49 години и верува дека стареењето е многу полесно за актерите отколку за пејачите или танчарите бидејќи нивните тела не поминуваат низ истите промени. Додала и дека ја цени оперската пејачка Марија Калас, која ја толкува во новиот филм, бидејќи продолжила да пее и покрај стравот од стареење.
Во Maria, Џоли ја игра американско-грчка сопран певица непосредно пред нејзината смрт во Париз. Во филмот, оперската дива се соочува со прашања за сопствениот идентитет и живот по гламурозната и бурна кариера во центарот на вниманието. Во реалниот живот, Калас почина од срцев удар во 1977 година, на 53-годишна возраст.
Биографскиот филм Maria ја имаше својата светска премиера на филмскиот фестивал во Венеција, каде што доби десетминутни овации. Џоли доби многу пофалби за нејзината изведба.
Филмот веќе се прикажува во одредени кина и ќе биде достапен на Netflix во странство од петок, 6 декември. Не се знае кога ќе биде достапен за македонските претплатници на стриминг платформата.
Следно Џоли ќе глуми во новиот филм на француската режисерка Алис Винокур, Stitches. Покрај Џоли, актерската екипа ја сочинуваат Ела Рампф и Луис Гарел.
