Утре ќе бидат префрлени 28 милиони евра средства за домашните платежни картички кон банките, а веќе од утре и се очекува да се издадат првите домашни платежни картички, најави министерката за финансии Нина Ангеловска во гостување за „Само вистина“ на Канал 5, посочувајќи дека банките со СМС ќе ги информираат граѓаните чии картички се изработени.
– Утре ќе бидат исплатени 28 милиони евра средства до деветте банки за мерката домашна платежна картичка. Картичките се дел испечатени. Дел од утре ќе почнат да се дистрибуираат. Секоја банка со различен интензитет на издавање и дистрибуција, бидејќи секоја банка има различна обврска колку картички ќе издаде. Најголемите три банки ќе издадат околу 85 отсто од сите картички и тие се навистина добро организирани. Издавањето ќе започне од оваа недела од утре, клиентите се информираат и им стигаат смс пораки од страна на банките, а најдоцниот рок поставен во уредбата за издавање на картичките е 18 јули. Доделувањето на картичките ќе биде дел утре, дел од наредната недела и понатаму етапно. Користењето на средствата е до 15 август, рече Ангеловска.
Издавачи на домашната платежна картичка се НЛБ Тутунска Банка, Стопанска Банка-Скопје, Комерцијална Банка, Халк Банка, Шпаркасе Банка, Охридска Банка, УНИ Банка, Централна Кооперативна Банка и Силк Роуд Банка.
Вкупно 324.479 корисници се евидентирани како корисници на домашната платежна картичка.
Корисници на домашната платежна картичка се граѓани со низок доход, односно 115.927 лица – приматели на социјална помош и невработени евидентирани како активни баратели на работа во АВРСМ до 22 мај 2020, кои оствариле нето-доход до 180.000 ден во 2019 и нето-доход до 60.000 денари во период јануари-април 2020 согласно евиденцијата на УЈП. Овие лица еднократно ќе добијат 9.000 денари на платежната картичка.
Корисници се и вработени со низок доход кои се 117.144 лица и тие ќе добијат 3.000 денари еднократно. Ова се лица кои се во работен однос и кои за периодот јануари- април 2020 година оствариле доход само по основ на плата и надоместоци на плата во нето-износ не поголем од 60.000 денари на ниво на полно работно време, според евиденцијата на УЈП. Тие ќе добијат и ваучер за домашен туризам од 6.000 денари преку мерката за јакнење на домашниот туризам на Министерство за економија.
Домашна картичка добиваат млади лица чиј број изнесува 87.014 кои ќе добијат еднократно 3.000 денари. Станува збор за лица со наполнети 16 години и не постари од 29 години заклучно со 22 мај 2020 година, активни учесници во државното формално средно образование и високото додипломско образование.
Домашна картичка ќе добијат и 4.394 здравствени работници ангажирани во справување со COVID-19, кои ќе добијат 40 отсто од последната основна нето-плата. Станува збор за вработени во ЈЗУ, Клиника за инфективни болести, Институт за јавно здравје, Центри за јавно здравје, Итна помош, инфективните одделенија и вработени во други одделенија ангажирани за тестирање, дијагностицирање и лекување на граѓани заболени од COVID-19.
Граѓаните кои имаат една трансакциска сметка кај банка издавач на картичката ја добиваат од таа банка. Граѓаните кои имаат две трансакциски сметки, картичката ја добиваат од банката преку која добиваат плата или социјална помош. Оние граѓани пак, кои имаат трансакциска во банка која не е дел од проектот и граѓаните кои немаат трансакциска сметка се распределени кај една од банките според принцип на фер распределба.
Ангеловска во гостувањето зборувајќи околу барањето да се продолжат мерките за покривање на минимална плата од страна на државата, рече дека едно се желбите, друго се можностите, истакнувајќи дека зборува за реален сектор, од кого има реални, разумни очекувања.
– Треба да имаме предвид дека овие силни задолжувања коишто се прават во време на COVID, за да излеземе со помалце последици, за поскоро да се справиме, за да ја дадеме потребната помош на секого, бидејќи ако ги погледнете мерките нема некој којшто е изоставен во сите пакети, од граѓани, од бизниси од сектори, дека ова е нешто што идните генерации и граѓаните и приватниот сектор ќе го враќаат, нагласи министерката.
Таа посочи дека треба да сме свесни оти ние се финансираме дефицитно, односно дека од една страна прибираме помалку приходи отколку што имаме расходи, што значи, како што образложи Ангеловска, дека државата нема големо зафаќање врз граѓаните и бизнисите кога се работи за полнење на државната каса со цел да ги сервисира сите потреби.
– Ние заземаме дел од фискалниот простор од идните години којшто ќе ни треба, за 2021, за брзо да се опоравуваме и враќаме, а во исто време да напоменеме дека се креирани навистина обемни, солидни мерки, додека притоа не е никако загрозена реализацијата на капиталните инвестиции, исплатата на покачените пензии, платите во јавната администрација коишто не беа намалени, со сето тоа ние успеавме да менаџираме и ликвидносно и да се справиме со секако очекуваниот пад на приходната страна, рече Ангелевска.
Таа потенцираше дека затоа на почетокот на кризата често посочувале оти важна е самосвесноста и солидарноста.
– Како во почитување на здравствените мерки и протоколи така и во овој дел, ние очекуваме разбирање, особено кога е направен навистина максимум во рамки на можностите па и над тоа би рекла ако погледнеме како се димензионирани сите мерки, заклучи министерката за финансии.
