Македонскиот селектор доби интересно прашање од романски новинар на кое даде уште поинтересен одговор.
Синоќа пред официјалниот тренинг на македонската фудбалска репрезентација во Букурешт, беше одржана и задолжителната прес-конференција на која присуствуваа селекторот Игор Ангеловски и играчот од средниот ред Бобан Николов, кој порано настапуваше токму во Романија.
На крајот од пресот еден романски новинар упати интересно прашање до македонскиот стратег.
„Кој играч од Романија би го повикале за претстојното Европско првенство, доколку би можеле?“, праша новинарот.
Ангеловски без воопшто да размислува го даде одговорот, краток и јасен: „Георге Хаџи“.
Хаџи е роден во 1965 година во Романија како внук на Кристијан Хаџи, бегалец од Егејска Македонија и родум од градот Кавала. Тој со семејството пребегал во Романија во 1932 година.
Дали Ангеловски навистина најмногу му се воодушевува на „Марадона од Карпатите“ или одговорот го даде поради потеклото на Хаџи, ќе треба да откриеме во некоја друга прилика.