Многуте пропуштени шанси синоќа во Букурешт ја чинеа македонската репрезентација освојување барем бод. Селекторо Игор Ангеловски токму само од тоа е незадоволен.
„За еден тренер е жалосно кога неговите играчи на 0:0 и на 0:2 ќе создадат толку зрели шанси, а на крај нема да се освои ниту бод. Сепак, гостувавме кај репрезентација која е главен фаворит за второто место во нашата група и покажавме дека можеме да се носиме со таков ривал. Не смее овој пораз да нѐ разочара, мора да се повратиме“, рече селекторот.
Несторовски, Пандев, Елмас промашуваа одлично шанси, особедо првиот кој уште во 8. минута промаши нешто недозволиво за фудбалер кој настапува во италијанската Серија А.
„Она што ни фалеше е завршница, да ги реализираме многубројните шанси. Тоа беше клучниот фактор, немањето реализација. Јас не памтам некогаш да сме имале толку многу шанси против ваков противник“, додава Ангеловски.
Кога Македонија успеа за две минути да постигне два гола и да израмни на 2:2 пред самиот крај, брзо стигна ново разочарување кога Јанис Хаџи постигна гол за победа.
„Мислам дека бевме добро поставени и при голот за 3:2, но топката среќно стигна до Хаџи, кој погоди. Не освоивме бод само заради многуте нереализираните шанси. Единствено што можам да им замерам на фудбалерите е лошата реализација“, искрен е селекторот.
Македонија токму на стадионот на кој настапи синоќа ќе ги одигра и првите два натревара од претстојното ЕУРО во јуни. По тој повод Ангеловски се обрати и до романската јавност.
„Овие два дена бевме перфектно пречекани и угостени од Романците. Веќе еднаш кажав дека романскиот народ е наш братски народ. Луѓето на стадионот и во хотелот беа гостопримливи и верувам дека романскиот народ ќе навива за Македонија на Европското првенство“, заврши тој.