Селекторот на македонската фудбалска репрезентација го коментираше објавениот список за претстојните натпревари, список кој повторно предизвика лавина реакција кај навивачите.
На денес објавениот список на повикани фудбалери повторни има играчи кои македонската фудбалска јавност не може да сфати зошто се повикани. Играчи кои не играат во своите клубови, илипка во репрезентацијата се вечни резерви, но според критериумите на селекторот заслужуваат повик.
„Списокот е составен од играчи кои беа дел од репрезентацијата веќе подолг период. Може да се забележи дека 99% од повиканите играчи се оние истите кои претходно го понесоа товарот, играа во Лигата на нации и квалификациите за ЕУРО и успеаја да ѝ го донесат историскиот успех на Македонија со пласманот на Европското првенство за прв пат во својата историја во сениорска конкуренција, нешто на кое чекавме од нашата независност“, вели Игор Ангеловски, пренесува ФФМ.
Иако многумина очекуваа промени, оние кои долго време ја пратат репрезентацијата и го познаваат начинот на работа на селекторот, знаат дека Ангеловски и порано работел според истиот принцип на повикување проверени и пред сѐ воиграни играчи и кои се добро вкомпонирани во тимскиот дух.
„Како човек и како селектор, никогаш не би му го одземал правото на некој да биде дел од националниот тим, а тоа да го заслужува и со односот кон репрезентативниот дрес и со постигнатите резултати преку повеќегодишна макотрпна работа“, заврши тој.
Според последнава изјава, сепак нејасно останува со кој однос не заслужија повик на пример Љупчо Дориев и Давид Митов Нилсон. Зошто шанса не им се дава да покажат дали заслужуваат повик Бојан Миовски, Дарко Чурлинов, Себастиан Ерера Кардона, Давид Бабунски, Леонард Жута, Јани Атанасов, Лука Станковски?
