Селекторот на македонската фудбалска репрезентација, Игор Ангеловски, денеска објави список од 26 фудбалери на кои ќе смета за претстојните три квалификациски натпревари за пласман на Мундијалот во Катар 2022.
Општо гледано, ништо ново. Истите имиња плус едвај еден повратник и еден дебитант. Даниел Аврамовски по добрите игри во Турција се очекуваше да биде повикан, а прв пат меѓу сениорите е младиот голман Ристе Јанков кој одлично брани за Работнички.
Повратници во репрезентацијата се Марјан Радески, кој годинава почна полека да си ја враќа формата во редовите на Академија Пандев, како и Ферхан Хасани чиј повик е несфатлив со оглед на тоа што во албански Партизани годинава има вкупно одграно, верувале или не, цели 9 минути. Веројатно доволно за во репрезентација.
Во поглед на минатите состави од есеноска, не добија повик Томе Китановски, Кристијан Тошевски, Дарко Мицевски, Еннур Тотре, Љупчо Дориев, Душко Трајчевски и голманот Даниел Божиновски. За Тотре и беше очекувано со оглед на тоа што не игра во Шкендија откако клубот одлучи така бидејќи не сакаше да го продолжи договорот.
Иако периодов на големо низ јавноста циркулираше веста дека повик ќе добие латералниот бек Себастиан Ерера Кардона, кој 5 години настапуваше во македонската лига и со тоа се здоби со право да игра и за нашата репрезентација, сепак него го нема на списокот. Дали е проблем документацијата кај ФИФА или Ангеловски решил дека не му треба, останува мистерија.
А, пак, од оној тест натпревар кој Ангеловски го организираше на 17 февруари, од тие 20 играчи денес на списокот се најдоа само двајца и тоа Јанков и Радески.
Столе Димитриевски - Рајо Ваљекано (Шпанија)
Дамјан Шишковски - Докса (Кипар)
Мартин Богатинов - Етникос (Кипар)
Ристе Јанков - Работнички
Стефан Ристовски - Динамо (Хрватска)
Висар Муслиу - Фехервар (Унгарија)
Егзон Бејтулаи - Шкендија
Кире Ристевски - Ујпешт (Унгарија)
Дарко Велковски - Ријека (Хрватска)
Езџан Алиоски - Лидс Јунајтед (Англија)
Ѓоко Зајков - Шарлроа (Белгија)
Енис Барди - Леванте (Шпанија)
Аријан Адеми - Динамо (Хрватска)
Бобан Николов - Лече (Италија)
Стефан Спировски - АЕК (Кипар)
Елиф Елмас - Наполи (Италија)
Тихомир Костадинов - Ружомберок (Словачка)
Даниел Аврамовски - Кајсериспор (Турција)
Марјан Радески - Академија Пандев
Ферхан Хасани - Партизани (Албанија)
Горан Пандев - Џеноа (Италија)
Иван Тричковски - АЕК (Кипар)
Илија Несторовски - Удинезе (Италија)
Александар Трајковски - Мајорка (Шпанија)
Крсте Велкоски - Сарајево (Босна и Херцеговина)
Влатко Стојановски - Шамбли (Франција)
Подготовките Македонија ќе ги започне на 22 март во Скопје, а првиот натпревар е закажан три дена подоцна против Романија во Букурешт. Следува натпревар со аутсајдерот Лихтенштајн на 28 во Скопје, а потоа на 31 во Дујсбург против велесилата Германија.