Селекторот на македонската фудбалска репрезентација е задоволен од вчерашната победа над Ерменија, тешко извојувана, но извојувана и во тешки услови за игра на жешкото скопско сонце.
„Им честитам на фудбалерите затоа што ова беа ненормални услови за игра, температурата беше проблем на теренот. Нормално е кога фудбалерите не се во полн натпреварувачки ритам да не се во полна форма, но покажавме нов квалитет затоа што одиграме на резултат. За мене е нормално за онаа пауза која следуваше, да одиграме ваков натпревар. Ми е криво што некои одлучија да играме во 15 часот, па и ни намалија наместо да имаме 5 имавме 3 измени, а некој треба да мисли и на здравјето на фудбалерите“, почна Ангеловски.
Оној кој ги одредува деновите и времето на одигрување на натпреварите е УЕФА. Дали нашата федерација испратила жалба за терминот од 15 часот, не се знае, но како и да е, натпреварот се одигра, а Македонија славеше победа од 2:1.
„Рано го отворивме противникот. Потоа, имавме уште две ситуации за гол, но не успеавме, па Шишковски одбрани добра шанса за Ерменија. Потоа дојде и вториот пенал, поведовме со 2:0, па немавме причина да притискаме со 200 посто. Свесно му ја препуштивме средината на теренот на противникот. Во вториот дел имавме некои опасни шанси за гол, во кои можевме да го завршиме мечот. Но, не ѝ гледам на победата во заби. Задоволен сум од резултатот“, вели македонскиот селектор за кого ова беше натпревар број 38 на кој ја забележа 17-тата победа. Има и 7 нерешени и 14 порази.
Изненадување беше тоа што Горан Пандев не се најде во почетните единаесет, но селекторот имаше добар изговор за тоа.
„Горан имаше само четири тренинзи до овој натпревар бидејќи не беше на стартот на подготовките кај Џеноа затоа што почнаа на 26-ти. Таков беше договорот, да одигра само 30 минути. Ни на крај памет не ми е да форсирам играчи, да дојде до несакани повреди. Имаме уште два тренинга до дуелот со Грузија на кој веројатно ќе стартува од почеток“, заврши селекторот.
Македонија во вторник од 18 часот гостува во Тбилиси кај Грузија.