Фудбалската репрезентација денеска ги започнува подготовките за баражот против Грузија, а селекторот Ангеловски моментално има проблем со тројца играчи од составот.
В четврток Македонија игра натпревар за историја, натпревар за она за кое се сонува уште од независноста, пласман на едно големо натпреварување. Противникот, Грузија, е веќе познат откако изминативе два месеца двапати игравме против нив во Лигата на нации.
„Знаеме против кого играме, знаеме за што играме. Треба да бидеме максимално сконцентрирани, мотивирано да го одиграме натпреварот и да го добиеме за конечно да се пласираме на Европското првенство. Ова е натпревар кој навистина носи посебни емоции бидејќи имаме шанса на фудбалска Македонија да ѝ донесеме пласман на Европско првенство. Со позитивните резултати кои ги остваривме се донесовме во таква ситуација, среќни сме што сме дел од ова финале, но не планираме тука да застанеме. Ова е потполно нов натпревар во однос на нашите два меѓусебни натпревари, ова е финале, двете репрезентации ќе влезат различно во дуелот во кој очекувам да решаваат нијанси, а тие да бидат на наша страна“, вели Ангеловски.
Дел од репрезентативците веќе пристигнаа во Скопје, а во текот на денот треба да пристигнат и останатите. Веќе отпадна голманот Даниел Божиновски кој беше тестиран позитивен на коронавирусот, а допрва ќе се знае ситуацијата со Аријан Адеми и Кире Ристевски. Првиот синоќа се повреди и не играше за загрепски Динамо, додека вториот периодов беше во карантин поради позитивен тест.
„Од фудбалерите кои пристигнаа во репрезентативната база, за жал, Даниел Божиновски е позитивен на COVID-19 и нема да биде во комбинација за овие натпревари. Денеска го очекуваме пристигнувањето на Кире Ристевски кој треба, исто така да има негативен тест за да може да се стави на располагање. Аријан Адеми ќе оди на детални медицински прегледи откако пријави повреда здобиена на загревање пред вчерашниот натпревар на Динамо. Јас се надевам дека нема да имаме дополнителни проблеми по пристигнувањето на останатите фудбалери и подготвени ќе ги започнеме планираните тренинзи“, дополнува селекторот.
Репрезентативците ќе тренираат во Скопје до среда кога утрово ќе заминат за Тбилиси со чартер лет. Таму дента ќе одржат еден тренинг, а в четврток од 18 часот е „да се биде или не“ натпреварот на стадионот „Борис Паичадзе“.