Музичката легенда Стинг синоќа одново ги освои срцата на неговите обожаватели. Очекувањата беа огромни за концертот на големиот музичар, а тој на публиката ѝ приреди концерт за паметење и раскажување.
Енергичен, посветен и задоволен од реакциите на публиката, и Стинг видно уживаше во концертот што ги спои сите генерации синоќа во ВИП Арената „Борис Трајковски“.
Концертот беше дел од промотивната турнеја „57th & 9th“ за истоимениот албум, а покрај новите песни, публиката ги слушна во живо и најголемите хитови на Стинг.
Вечерта ја отворија со заеднички настап Стинг и син му Џо Самнер кој му е музичка поддршка на турнејата. Покрај уживањето во прекрасниот вокален спој на таткото и синот, публиката ревносно реагираше на обраќањето на Самнер на македонски по изведбата: „Татко ми мисли дека знам да зборувам македонски. Како е, Скопје?“
По краткиот настап на Самнер, кој очигледно ги наследил музичките гени на Стинг, почна вистинската еуфорија. Englishman in New York, Mad About You, Fields Of Gold, Shape Of My Heart... се редеа хитовите еден по друг додека салата одекнуваше во еден глас.
Најголемите хитови на Стинг беа одлично надополнети со фантастичен лајт шоу што ја носеше публиката од вибрантниот Њујорк, преку златните полиња, до црвеното светло на Roxanne кога Стинг ја покажа неговата виртуозност во импровизирањето и ја спои неговата легендарна песна со подеднакво безвременската Ain’t No Sunshine When She’s Gone.
Целата публика беше на нозе кога се изведуваше можеби најголемиот комерцијален хит на Стинг на овие простори, Desert Rose. Еуфоријата беше на високо ниво и кога се разлеаја звуците на големиот хит на поранешниот бенд на Стинг, „Полис“: Every Breath You Take.
Нескриена радост и по некоја солза се прелеваа низ преполната сала што го врати Стинг и неговиот бенд на бис, кога на првите звуци на Fragile публиката беше во транс.
„Треба да се вратиме тука!“, рече Англичанецот во Скопје на заминување. Сигурни сме дека македонската публика остави подеднаков впечаток кај големиот Стинг колку и вчерашното незаборавно музичко патување низ децениите кај неговата верна публика.
Фото: Авалон продукција