Аргентинскиот стручњак Маурисио Почетино синоќа доби отказ од Челси, што предизвика негодување кај навивачите, а причината која Англичаните ја открија утрово е прилично неверојатна.
Почетино доби отказ во Челси откако на крајот на сезоната конечно го среди „раштиманиот“ оркестар и го одведе во Европа преку шестата позиција на табелата, нешто што пред само неколку недели никој не можеше да го очекува.
Но, тогаш настана шок за навивачите и самиот тренер бидејќи сопственикот Тод Боли реши да го отпушти. Така, Челси ќе го добие петтиот тренер во 20-те месеци од владеењето на новиот американски сопственик.
Уште поневеројатно од самиот отказ би можела да биде причината, доколку угледниот англиски The Telegraph објави вистинити информации. Според овој весник, раздорот дошол откако на клупскиот состанок претходно во текот на сезоната Почетино одбил да ангажира специјалист за изведување прекини.
The Telegraph пренесува дека сопственикот Боли го прашал Почетино дали му треба стручен тренер за изведување прекини, што стана вообичаена практика во елитниот фудбал. Меѓутоа, Аргентинецот ја отфрлил идејата.
„Ние сме стручен штаб кој е задолжен за сѐ. Фудбалот им припаѓа на играчите, а не на специјалистите“, бил одговорот на Почетино, кој на крајот го чинеше работа.
Кога Челси загуби од Ливерпул во финалето на Лига купот, прими гол токму од корнер. Токму по тој натпревар настана раздор меѓу тренерот и сопственикот на клубот, со што Почетино се доведе до отказ. Клубот реши да го почека крајот на сезоната за да се впушти во потрага по нов тренер.
По поразот во финалето на Лига купот, раководството на Челси самоволно формираше цел оддел посветен на корнери и слободни удари, нешто што Почетино одбиваше да го направи.
