Тврдина која е невозможно да се освои - тоа беше домашниот терен за Шпанците во последните 98 години, сè додека во Севилја не се појавија Пикфорд, Кејн, Рашфорд и Стерлинг.
Овие играчи за само 38 минути игра на гостувањето кај Шпанија, во рамките на групната фаза од Лигата на нациите, ја доведоа Англија до огромно водство од 3:0.
Откако првите три шута кон противничкиот гол завршија во мрежата, Англичаните не го замолчија само целиот стадион на Бетис, туку им успеа нешто што не ѝ успеало на ниту една друга репрезентација од 1920 година па наваму, поточно откако постои шпанскиот национален тим.
Црвената Фурија никогаш во официјален натпревар на свој терен нема примено три голови. Сè до 15 октомври 2018 година и до доаѓањето на Англија во Севилја.
Ова воедно беше и прва победа на Англија против Шпанија на гостински терен уште од декември 1987 година, кога Гери Линкер ги постигна сите четири погодоци за победата од 4:2 на Гордиот Албион во пријателски натпревар.