Претседателот на Кошаркарската федерација на Македонија, Перо Антиќ, одговори на заканите упатени од страна на МЗТ.
„МЗТ Скопје треба да сфати дека ова е тимски спорт и дека не е сам во лигата. Тоа е клуб со најдобри услови за работа и најдобри резултати последните години, тоа јас не можам да го негирам. Со години е единствен што нè претставува во меѓународните натпреварувања, а учеството во АБА лигата го сметам за многу важен елемент, во период кога Евролигата или ФИБА се недостижни за нас“, почнува претседателот во интервју за официјалната веб-страница на КФСМ во кое се осврна и на други теми.
„Мора да се знае дека во лигата постојат и Вардар и Академија ФМП и Пелистер и други, и кон сите треба да имаме ист однос. Сите да имаат исти обврски и исти привилегии. Федерацијата без клубови не може, клубовите без Федерација не можат. Тоа е јасно, и го кажав тоа уште кога ја презедов функцијата“.
МЗТ постави услов до КФСМ дека доколку за три дека не ги добие назад парите уплатени за котизација во вториот дел од сезоната, кој не се доигра пораки прогласениот предвремен крај, се закани дека ќе покрене кривична пријава проти Антиќ и Федерацијата.
„Жал ми е што луѓето од МЗТ така се однесуваат кон нас. Почнаа војна, не дојдоа ни на разговор. Од нас немаше ниеден одговор, односно било каква провокација кон клубот. Дури и тогаш кога за мене зборуваа дека не постојам и дека не сакаат никаква комуникација со Федерацијата. Сите што сме инволвирани, треба да знаеме дека кошарката не почнала од нас и дека таа ќе се игра и откако ќе си заминеме од функциите. Единствено што сакам, уште еднаш да нагласам, дека треба да работиме за општото добро, за доброто на македонската кошарка, за сите да имаме бенефит“, потенцира Антиќ.
„МЗТ ги има сите бенефиции како да ја освоил титулата, иако првенството не е ни 50% одиграно, ни според натпреварите, ни според периодот на играње. Не се поминати седум, туку речиси четири месеци и 17 кола. Прво сакаа да се добие шампион надвор од терен, па кога не добија поддршка, предложија да се доигра остатокот од сезоната. Тоа не е возможно бидејќи странските кошаркари не се во земјава и не постојат услови да се вратат. Побараа да се воведе дополнителен преоден рок, но тоа не беше возможно, токму бидејќи сите сме еднакви и не може правилата да се менуваат на кого како ќе му текне“, Антиќ ги открива условите кои ги поставувал клубот од Аеродром.
Очигледно превирањата помеѓу актуелниот шампион и Федерацијата ќе продолжат бидејќи ниту една страна засега не најавува попуштање. КФСМ му го одговори на МЗТ на барањето за поврат на уплатените средства, оценувајчи го барањето како неосновано. Целосниот одговор на Федерацијата до клубот може да се прочита тука.