На собраниска седница денеска ќе биде поставен предлог-законот на Левица за ограничување на астрономските суми кои пратениците ги наплаќаат на име патни трошоци.
„Според сегашната манипулативна методологија, за секои извозени 100 км пратениците наплаќаат по околу 1.700 денари на име 'ПАТНИ ТРОШОЦИ' + патарини. Ние предлагаме овој трошок да се намали на 6,5 литри гориво на поминати 100 км (што би било околу 500 денари). Денес е денот Д. Да видиме како ќе се изјаснат пратениците на пленарната седница закажана во 11:00 часот...“, објави претседателот на Левица. професорот Димитар Апасиев.
Тој претходно објави дека само во последните 15 години за патните трошоци на пратениците народот платил над 7 милиони евра.
Од партијата Левица синоќа соопштија дека ВМРО-ДПМНЕ, ВЛЕН и ЗНАМ се изјасниле негативно по нивниот предлог и дека на собраниската седница нема да гласаат за предлогот за кратење на патните трошоци.
