Пратеникот од Левица понуди решение како да се запре со луксузирањето од страна на пратениците со надоместокот за патни трошоци.
Откако во јавноста излезе нова скандалозна листа на пратеници кои земале преголем надоместок на основа на патни трошоци, пратеникот од редовите на Левица, професорот Димитар Апасиев, во изјава за Канал 5 понуди решение кое би требало да го реши овој проблем од кој најголема штета трпат граѓаните чии народни пари завршуваат во пратеничките длабоки џебови.
„Најелегантното решение според нас, бидејќи има неколку варијанти, е постоечкото 20% на изминат километар да се измени и да се спушти на 5%. Според нашите калкулации, во тој случај, цената којашто ќе ја добиваат пратениците ќе биде изедначена со цената на повратниот автобуски билет за одредена релација“, вели Апасиев.
Тој даде и еден пример како за патување кое вреди 300 денари пратениците земаат диполнителни 700 денари и го олеснуваат буџетот, а сето тоа е законски.
„Еден пример: патување од Куманово е 40 километри наваму и 40 километри натаму. за 80 километри добивате 1.000 денари, а реалниот трошок за изминати 80 километри е 300 денари. 700 денари Собранието ги дава бакшиш“, додава тој.