Компанијата за производство на електрични возила Tesla вчера соопшти дека минатиот квартал имала загуба од 702 милиони долари. Приходите на компанијата паднаа за 37% во споредба со претходниот квартал.
Волстрит веќе беше подготвен за, како што аналитичарите го нарекоа, „апокалиптичниот квартал“, но резултатите се многу полоши од очекуваното.
Иако компанијата и претходно има пријавувано големи загуби, аналитичарите предвидуваа дека Tesla ќе влезе во минус со околу 301 милиони долари за тој квартал. Реалните бројки се покажаа повеќе од двојно поголеми.
Вредноста на акциите на Tesla се намали по објавувањето на извештајот, но потоа се врати во нормала.
Компанијата пријавуваше профит два квартали со ред претходно. Минатиот квартал, на пример, имаше профит од 139 милиони долари, со рподажба од 7,2 милијарди долари.
Има неколку причини за загубата на Tesla, според аналитичарот Карл Брауер од Autotrader. Една од нив е фактот дека автомобилските брендови како Porsche, Audi, Mercedes и Hyundai влегоа на пазарот за електрични возила со свои модели, со што ѝ приредија сериозна конкуренција на Tesla за прв пат во историјата на компанијата.
Од компанијата рекоа дека очекуваат следниот квартал бројките да се подобрат.