Минатата недела Apple објави дека ажурирањето на iOS 16.3 ќе пристигне неделава и таа надградба стигна вчера со главен фокус на безбедноста.
iOS 16.3 додава можност за користење безбедносен клуч за заклучување на вашиот Apple ID и се чини дека ја носи напредната заштита на податоците на компанијата за функцијата iCloud во земји надвор од САД.
Ажурирањето, исто така, го прилагодува системот за итни SOS повици, вклучува нова позадина „Unity“ и додава поддршка за HomePod од втората генерација.
Минатата година Apple ја објави функцијата за безбедносни клучеви, која им овозможува на корисниците дополнително да ги заштитат профилите на iCloud. Вклучена е и напредна заштита на податоците, која ги проширува типовите на податоци што се шифрирани од крај до крај во складирањето на Облакот.
Оваа функција беше достапна во САД со iOS 16.2, но се чини дека новото ажурирање на iOS 16.3 ја носи функцијата на глобално ниво. Apple го отстрани известувањето за оваа функција во која се вели дека е достапна само во САД. Пристигнаа потврди и од некои други земји за неговата достапност.
iOS 16.3 пристигнува и со нови функции за сопствениците на HomePod Mini, откако самите уреди добија ново ажурирање на софтверот. Најзначајната промена е тоа што тие ќе функционираат како сензори за температура и влажност. Исто така, ажурирањето ќе ви овозможи да поставите автоматизација користејќи го вашиот глас и да ја прашате Siri за тоа каде се наоѓаат членовите на семејството, пријателите итн.
Можете да го преземете новото ажурирање со одење до Settings > General > Software Update. Можеби ќе помине некое време пред ажурирањето да стане достапно за сите, но во секој случај, ова ажурирање може да го очекувате многу наскоро.
