„Apple купи околу 100 компании во последните шест години“, откри извршниот директор на компанијата Тим Кук, пренесе BBC.
„Тоа значи дека, во просек, се купува компанија на секои три до четири недели“, рече тој на годишното собрание на акционерите на Apple.
Apple неодамна ги обезбеди своите најголеми квартални приходи на сите времиња, достигнувајќи 111,4 милијарди долари во првиот квартал од фискалната 2021 година.
Кук на состанокот на акционери изјави дека аквизициите се насочени првенствено кон стекнување технологија и талент.
Најголемата зделка на Apple во последната деценија беше купувањето на „Beats Electronics“, производител на слушалки основан од раперот и продуцент Доктор Дре, вреден три милијарди долари.
Друга голема набавка беше компанијата за софтвер за препознавање музика Shazam, вредна 400 милиони долари, во 2018 година.
Најчесто, Apple купува помали технолошки компании, а потоа ги вметнува нивните иновации во сопствените производи. Таков пример е PrimeSense, израелска компанија за 3Д сензори чија технологија придонесе за FaceID на Apple.
Списокот на аквизиции и инвестиции на Apple е исклучително разновиден.
