Новите смартфон и таблет на Apple ќе дебитираат на настанот закажан за 21 март. Компанијата ќе гo претстави iPhone 5SE кој ќе има 4-инчен екран, како и новиот iPad Pro со дијагонала од 9,7 инчи.
Ова ќе биде прв помал iPhone по 2013 година, кога на пазарот се појави iPhone 5C. Новиот iPhone 5SE ќе биде сличен со iPhone 5S, но ќе има малку заоблени рамки, слично како што е кај iPhone 6 и 6S.
Според шпекулациите, овој модел ќе има A9 процесор, истиот од iPhone 6S, а ќе има и Touch ID сензор за отисоци од прстите и Apple Pay услуга.
Претходните информации сугерираа дека смартфонот ќе има задна камера од 8 мегапиксели, но постојат гласини, дека новиот уред ќе ја добие истата камера од iPhone 6S која располага со 12 мегапиксели.
Сепак, новиот смартфон нема да ја има 3D Touch технологијата.
Покрај iPhone 5SE, Apple ќе го претстави и 9,7-инчниот iPad Pro, иако претходните шпекулации беа дека ќе биде претставен iPad Air 3. Помалата верзија на Pro таблетот на Apple ќе има нов дизајн, четири звучници, нов Smart конектор и Smart Keyboard тастатура, а ќе има поддршка и за Apple Pencil.