Сè повеќе се шпекулира за претстојната серија на iPhone 15, а сега се појавија нови гласини.
Најновите информации сугерираат дека моделите на iPhone 15 Pro би можеле да добијат поскапување, што ќе се случи за прв пат од 2017 година.
Во својот извештај, аналитичарот Џеф Пу посочи можно зголемување на цената за моделите iPhone 15 Pro и 15 Pro Max. Тој вели дека причината за поскапувањето би можело да биде додавањето на голем број подобрувања на новиот iPhone.
Овие подобрувања може да вклучуваат изработка од титаниум, цврсти копчиња за вклучување и јачина на звук, перископски објектив, повеќе RAM и побрз USB 3.2 Type-C порт. Дополнително, телефоните ќе ја користат стратегијата на Apple за имплементирање на различни чипови во модели со и без Pro во името, при што моделите Pro најверојатно ќе користат чипсет A17 Bionic.
Ова не е првпат да слушаме за можно зголемување на цената на моделите на iPhone 15 Pro. Претходниот извештај сугерираше дека iPhone 15 Pro ќе има почетна цена од 1.099 долари, додека 15 Pro Max би можел да чини 1.199 долари во основната верзија.
Станува збор за зголемување од околу 100 долари, што ќе налути многу корисници. Останува да видиме дали тоа ќе се одрази на моделите iPhone 15 и 15 Plus.
Секако, како и секогаш, новостите од овој тип треба да се земат со резерва бидејќи има уште неколку месеци до објавувањето на серијата iPhone 15.
