Apple одлучи на корисниците автоматски да им се наплаќа зголемена цена за претплата, дури и без дозвола.
Претходно оваа година, Apple тестираше нова функција која ќе им овозможи на девелоперите да наплаќаат зголемени цени преку автоматско обновливи претплати. Иако оваа програма беше ограничена на избрани девелопери, компанијата сега ги воведува овие промени за секого, со одредени ограничувања.
Во моментов, кога девелоперот ќе ја зголеми цената, корисниците мора да потврдат дека ќе продолжат да ја плаќаат претплатата, во спротивно таа автоматски се откажува. Со новото ажурирање на продавницата, корисниците сепак ќе бидат известени, но зголемените цени ќе се наплаќаат и без дозвола на корисникот.
Според компанијата, на својата страница за девелопери на Apple, ќе има одредени ограничувања за да се спречи злоупотреба на оваа функција. На пример, девелоперите ќе може да ја зголемат цената само еднаш годишно.
Другите ограничувања вклучуваат максимално зголемување од 5 долари месечно и 50 долари годишно. Во такви ситуации, Apple ќе ги известува корисниците за новата цена преку е-пошта, известувања и предупредувања во самата апликација. Корисниците исто така ќе имаат лесен пристап до опцијата за откажување на претплатата доколку сакаат.
Ако цената на претплатата се зголеми над максималната граница, корисниците ќе мора повторно да се претплатат. За корисниците кои нема да го направат тоа, претплатата нема да се обнови во следниот период на наплата.
„Претплатата со автоматско обновување е одличен начин да им се овозможи на луѓето пристап до содржината, услугите или напредните функции во вашата апликација. Apple продолжува да дава пример за транспарентност и им олеснува на претплатниците да ги прегледуваат, откажуваат или управуваат со нивните претплати. Нашиот сеопфатен пристап вклучува испраќање е-пошта, известувања и предупредувања во апликацијата, за да ги информираме претплатниците за претстојните промени и начините на кои можат да управуваат со нивните претплати или да ги откажат ако сакаат“, се вели во соопштението на девелоперите.
