Солзите на лицето на Пауло Дибала на клупата на Рома не беа поради тоа што ќе ги пропушти наредните натпревари на неговиот клуб, туку затоа што сега во прашање е доведено и неговото учество на светскиот собир во Катар.
Аргентинскиот напаѓач реализираше пенал во победата на Рома од 2:1 над Лече, но наместо да го слави голот тој се фати за ногата и направи болна гримаса на лицето. Очигледно при шутот веднаш почувствува дека нешто истегнал и почна да цупка, излезе вон теренот и побара замена додека соиграчите му честитаа за голот.
Го седнаа на клупата за резерви и веднашп му ставија мраз на болното место, додека Дибала не можеше да ги сопре солзите, не поради болка, туку поради тоа што добро знае колку сериозна може да биде таквата повреда, а за 40 дена го чека Мундијал.
По натпреварот Жозе Мурињо говорејќи за DAZN изјави дека не верува дека Дибала повторно ќе заигра за Рома годинава. Тоа не значи дека не би се вратил за Мундијалот, туку дека од почетокот на ноември следува пауза поради истиот, а Калчото ќе продолжу дури во јануари 2023 година.
„Велам лошо, но мислам дека е многу, многу лошо. Не сум доктор, но со моето искуство, и според она што го слушнав зборувајќи со Пауло, мислам дека нема да го видиме годинава“, рече Мурињео, очигледно песимист за враќањето на Дибала.
Сериозноста на повредата на Дибала допрва треба да се дознае откако ќе се направат потребните медицински испитувања.
Серија А продолжува до 13 ноември за кога е закажано последното коло пред мундијалската пауза. Аргентина првиот натпревар на Мундијалот го има на 22 ноември против Саудиска Арабија.
Останува да видиме колку е сериозна повредата на Дибала и дали ќе се опорави на време. Аргентина, репрезентацијата која на последниот Мундијал на Лео Меси е со шампионски амбиции, стравува за негово неиграње во Катар.