Килјан Мбапе пред Мундијалот ги навреди Јужноамериканците, па сега му се одмаздуваат на најразлични начини.
Аргентина стана светски шампион откако во драматичното финале ја победи Франција на пенали. Беше 2:2 во регуларниот дел, 3:3 по 120 минути игра, по што „Албиселесте“ на пенали славеа со 4:2. Троен стрелец на тој натпревар беше Килјан Мбапе, а оттогаш е и на мета.
Прв го прозиваше аргентинскиот голман Емилиано Мартинес кој во соблекувалната побара минута молк за францускиот напаѓач, а потоа на парадата во Буенос Аирес носеше кукла со неговиот лик.
Сега од Аргентина дојдоа и шокантни снимки на кои се гледа како навивачите во Буенос Аирес направиле посмртен ковчег, а на него залепиле слика од Мбапе. На крајот сето тоа го запалија. И тоа се случи токму на денот на 24. роденден на Мбапе - 20 декември.
Сјајниот напаѓач е на голем удар на Аргентинците поради неговата изјава пред Мундијалот кога рече дека пехарот сигурно ќе го освои европска репрезентација бидејќи фудбалот во Јужна Америка е помалку квалитетен.
„Аргентина и Бразил немаат такво ниво на натпреварување. Во Јужна Америка фудбалот не е развиен како во Европа и затоа гледате дека Мундијалите секогаш ги освојуваат Европејци“, рече Мбапе.
Дека со таа изјава ги налути сите на овој континент, а не само Аргентинците, прв му порача чилеанскиот фудбалер Артуро Видал. Веднаш откако Аргентина во финалето ја совлада Франција, Видал му порача да „учи од Јужноамериканците“ бидејќи според неговите зборови „тие го измислиле фудбалот“.