Бразилскиот 32-годишен репрезентативец Давид Луиз и десет години помладиот шкотски репрезентативец Киран Тирни се новите засилувања во одбраната на Арсенал во последниот ден од летниот трансфер прозорец во Англија, откако челниците на „топџиите“ ги договорија трансфер условите со Челзи, односно Селтик.
Иако во мај потпиша нов, двегодишен договор за останување на „Стемфорд Бриџ“, Давид Луиз во средата побара трансфер, бидејќи под водство на новиот тренер Франк Лампард падна во втор план и го изгуби местото во стартната постава.
Челзи и Арсенал го договорија трансферот и за 8 милиони фунти искусниот бразилски стопер ќе се пресели на другиот крај на Лондон.
Луиз во два наврата го носеше дресот на Челзи, од 2011 до 2014 и од 2016 година кога се врати во Лондон по двегодишниот ангажман во ПСЖ. Во дресот на лондонскиот клуб Бразилецот освои една титула првак на Англија (2017), два ФА купа (2012 и 2018) и три европски трофеи: ЛШ 2012, Европска лига 2013 и 2019 година.
На последниот ден од предниот рок договорен беше и трансферот на шкотскиот дефанзивец Киран Тирни од Селтик, а според британските медиуми, Арсенал за неговото доаѓање ќе му плати на шкотскиот првак отштета во висина од 25 милиони фунти, што со бонуси може да стигне до 30 милиони фунти.
Тирни имаше договор со Селтик до летото 2023 година.
Англиските клубови имаат време до 18 часот денеска да ги финализираат трансферите на играчи кои се под договор со други клубови.
