Едниот ризикува да отпадне од местата кои водат во Лигата на шампионите, другиот никако да фати приклучок за истите. Ремито на „Емирејтс“ е голем чекор назад за двата тима.
„Топчиите“ синоќа беа пред императив победа на домашен терен над тимот на Лестер, кој пак го загуби третото место од Челси.
Натпреварот беше изедначен, двата тима имаа шанси за гол, но први поведоа домаќините во 21. минута преку Пјер-Емерик Обамејанг по една одлична асистенција од Бујако Сака.
Петнаесет минути подоцна Џејми Варди одлично му нафрли на Келечи Ихеаначо кој ја затресе домашната мрежа, но потоа ВАР го поништи голот под изговор дека Нигериецот претходно направил фаул над Шкодран Мустафи.
Само 4 минути откако влезе во игра, младиот Едвард Нкетија во 75. минута направи опасен фаул над Џејмс Џастин кој главниот судија прво го оквалификува како жолт картон, но на интервенција на ВАР собата го промени во директен црвен.
Играчката предност „Лисиците“ конечно ја искористија во 84. минута кога Демарај Греј ја протна топка во шестнаесетникот каде најдобриот стрелец во Премиер лигата, Џејми Варди со својот голгетерски инстикт ја смести во домашната мрежа.
До крајот Лестер тргна на гол за победа, меѓутоа резултатот од 1:1 остана и по последниот судиски свиреж.
Ремито значи дека Лестер не само што падна на 4. место откако Челси славеше над Кристал Палас со 2:3, туку и ризикува со евентуална победа на Манчестер Јунајтед да му се доближи на само 1 бод.
Од друга страна, Арсенал испушти прилика со победа да дојде на минус 6 од 4. место на Лестер и да донесе некаква надеж за пласман во Лигата на шампионите.