Градоначалничката на Град Скопје, Данела Арсовска, разреши уште еден директор, Александар Кузинаков од ЈП „Дрисла“.
Како што велат од Град Скопје, Кузинаков е разрешен поради неправилности при работењето и непочитувањето на договорот за вработување.
„За неговото работење до Градот Скопје пристигнати се бројни пријави со индиции за злоупотреба и пречекорување на овластувањата за што Градот Скопје веќе најави ад хок ревизија. Справувањето со корупцијата и самоволието во Градот Скопје беше и едно од главните предизборни ветување на градоначалничката Данела Арсовска. Никој не смее да си поигрува со народните пари, а уште помалку со довербата на граѓаните на градот Скопје“, се наведува во соопштението од Град Скопје.
Во ЈП „Дрисла“ е најавена и вонредна ревизија од Град Скопје која треба да започне до крајот на оваа недела.
Додадоа и дека до крајот на оваа недела отпочнува со спроведување вонредна ревизија во работењето на сите јавни претпријатија под негова надлежност.
