Чилеанскиот репрезентативец Артуро Видал ја промени одлуката само неколку часа откако најави дека се пензионира од националниот дрес. Тој изјави дека избрзал со одлуката и смета дека вистинските воини остануваат до крај.
Играчот од средниот ред, кој настапува за Баерн Минхен, по поразот на неговиот национален тим од Бразил со резултат 3:0, најави дека се пензионира од репрезентацијата на Чиле.
Поразот значеше дека Чиле нема да патува на Светското првенство во Русија 2018, и со тоа ја испушта шансата да се бори за уште еден репрезентативен трофеј.
Но, брзо потоа, Видал се премисли и ја соопшти конечната одлука на јавноста.
„Воинот може да плаче, да чувствува страв, и може да разочара, но никогаш не се предава и ќе остане да војува до крај. Чиле е група составена од воини, а јас сум горд што сум дел од таа група. Кога и да ме повикаат, ќе бидам на располагање на националниот тим. Напред Чиле!“, соопшти Видал.
Видал има одиграно 98 натпревари во националниот дрес, и има постигнато 23 гола. Притоа, тој освои и две Копа Америка трофеи, двапати совладувајќи ја Аргентина во финалето.