Аспиринот не ги подобрува шансите за преживување кај пациентите примени во болница со COVID-19, покажа најново британско истражување.
Кај пациентите со ковид претходно беше забележан поголем ризик од развој на згрутчувања на крвта во телото, особено во белите дробови.
Помеѓу ноември минатата година и март 2021 година, беше спроведена голема студија на 15.000 пациенти примени во болници со COVID-19, а целта беше да се тестира ефектот на аспиринот, лек кој широко се користи за спречување на згрутчувања при боледување од некои други болести.
Како дел од студијата, вкупно 7.351 пациент примал 150 милиграми аспирин дневно, а 7.451 не. Изборот бил случаен.
Истражувачите не најдоа докази дека аспиринот ја намалува смртноста, но беше забележано дека пациентите кои земале аспирин биле хоспитализирани малку пократок период, од осум дена до девет, и дека по 28 дена повеќе биле отпуштени од болница бидејќи ја прележале болеста (75 проценти наспроти 74)
Занемарливи разлики
Питер Хорби, професор по заразни болести на Оксфорд и еден од авторите на студијата, рече дека ваквите разлики се занемарливи за да се оправда широко распространетата употреба на аспирин кај пациенти со ковид.
Неговиот колега Мартин Ландреј, професор по епидемиологија, рече дека е разочаран од фактот што толку евтин и широко распространет лек се покажа како неефикасен во овој случај.
„Но, токму затоа е важно вакво истражување - да откриеме кои терапии функционираат, а кои не“, рече тој.