Италијанските власти, во рамките на истрага што ја покрена Европската комисија, во италијанската фабрика Catalent Anagni открија огромна количина дози на вакцината AstraZeneca, информира весникот La Stampa додавајќи дека вакцините биле подготвени за транспорт до Обединетото Кралство.
Во Италија, значи, постои вакцина за која се борат ЕУ и Обединетото Кралство, коментира весникот. Оваа количина вакцини е исклучително важна и за ЕУ и за Обединетото Кралство. Што се однесува до Европската Унија, ова е двојно повеќе отколку што цела Европска Унија досега има добиено од AstraZeneca, додека за Британците тоа значи гаранција дека скоро 15 милиони граѓани ќе добијат втора доза од вакцината.
Според Irish Times, се работи за вакцини произведени во холандска фабрика кои завршиле во Италија.
– AstraZeneca има договор и со Европската Унија и со Обединетото Кралство, па прашање е кого ќе испочитува со овие дози, коментира весникот.
Како што наведува Irish Times, меѓу Брисел и Лондон имало многу телефонски повици за судбината на тие дози. Во исто време, Европската Унија изработува предлози за засилување на контролата врз извозот на вакцини, во обид да се присили AstraZeneca да испорача повеќе вакцини на Унијата.
– Очекувавме испораки во стотици милиони, а не добиваме ниту четвртина, рече Сандра Галина, главниот преговарач на Комисијата за вакцини.
