Откако синоќа со 3:1 го елиминираше Наполи, екипата на Аталнта се избори за финална пресметка со Јувентус.
Италија ќе добие нов куп шампион бидејќи актуелниот бранител Наполи синоќа доживеа елиминација. По оние 0:0 во Неапол минатата среда, вчера „Партенопеите“ потклекнаа во Бергамо.
Уште по само 16 минути игра „Деа“ веќе обезбеди убедливо водство од 2:0. Во 10. минута Дуван Сапата со одличен удар го отвори резултатот, а шест минути подоцна истиот играч убаво го пронајде Матео Песина кој го дуплираше водството.
Македонскиот репрезентативец Елиф Елмас беше во стартниот тим на Џенаро Гатузо, но на полувремето остана во соблекувалната откако беше заменет со Матео Политано.
Наполи во 53. минута ја врати надежта со голот на Ирвинг Лосано, па му фалеше уште еден гол за со 2:2 да оди во ново финале благодарение на правилото за гол на гости.
Сепак, со својот втор гол во 78. минута Песина се погрижи бранителот да биде елиминиран.
Аталанта за куп пехарот сонува од 1963 година кога прв и последен пат го освои, а тоа го направи победувајќи го Торино со 3:1. Има и три загубени финалиња во 1987, 1996 и последното во 2019 кога загуби од Лацио со 2:0 на „Олимпико“ во Рим.
Финалето помеѓу Аталанта и Јувентус ќе се игра на 19 мај, а стадионот допрва ќе биде одреден.
