Мадридски Атлетико потврди дека двајцата заразени со COVID-19 во клубот се фудбалерите Анхел Кореа и Шиме Врсаљко.
Шпанскиот клуб вчера потврди дека има двајца позитивни во своите редови, без да каже дали се работи за фудбалери или членови на стручниот штаб.
Сепак, денеска беше соопштено дека првотимците Анхел Кореа и Шиме Врсаљко се позитивни на COVID-19, па Аргентинецот и Хравтот веднаш заминале во самоизолација и нема да бидат дел од екипата што ќе игра во завршницата на Лигата на шампионите.
Шпанскиот клуб на 13 август во Лисабон ќе игра четвртфинален натпревар против Лајпциг, а ако помине ќе игра против подобриот од дуелот Аталанта - ПСЖ.
Атлетико во осминафиналето го исфрли шампионот Ливерпул, непосредно пред да биде паузиран фудбалот во цела Европа.