Германската компанија Audi влезе во луксузниот купе-SUV сегмент со претставување на моделот Q8, кој застана на врвот на семејството Q и ќе им го понуди на корисниците најдоброто од двата света, односно ќе ја донесе елеганцијата на купе со пет врати и сестраноста на голем SUV.
Димензиите на Q8 се приближно еднакви со оние на Q7, но тој личи понизок благодарение на слегувачката линија на покривот.
Меѓуосовинското растојание изнесува скоро три метри и со тоа овозможува автомобилот да има внатрешност за која од Audi тврдат дека е супериорна во однос на директните ривали во истиот сегмент, а тоа се BMW X6 и Mercedes-Benz GLE Coupe.
Визуелно Q8 се разликува од останатите членови на семејството Q, бидејќи карактеристичен за него е новиот дизајнерски јазик на Audi, кој за првпат беше прикажан со новиот A8. Тој поседува истакната решетка кај ладилникот со шест хромирани летвички, а од страните доаѓаат тенки matrix LED светла.
Внатрешноста е многу слична со онаа на Audi A8, тука се двата екрани чувствителни на допир кои се поставени на централната конзола, а тука е и третиот екран кој се наоѓа пред возачот. Овој екран покажува повеќе информации за возилото, додека останатите два екрани се користат за управување на Infotainment системот и клима уредот.
Audi Q8 располага со 3.0-литарски мотор, кој треба да го придвижи масивното тело од 2.145 килограми. Моторот на овој автомобил користи блага хибридна технологија, која се состои од 40-волтен електричен систем, литиум-ионски батерии, стартер и алтернатор.
Тој развива 286 коњски сили и вртежен момент од 600 Nm, а силата се пренесува на сите четири тркала преку 8-степенскиот tiptronic автоматски менувач и Quattro системот на Audi. Од 0 до 100 км/ч забрзува за само 6,3 секунди, а има максимална брзина од 230 километри на час.
Овој автомобил ќе се произведува во Братислава во Словачка, а ќе дебитира на германскиот пазар и во другите европски држави во третиот квартал од наредната година.