Судејќи по новитетот, креативците во Audi зеле слободни денови.
Audi претстави нови концепти во Шангај. Иако се работи за атрактивно скроени автомобили, најголем интерес предизвика она што го нема. Имено, компанијата реши да се „откаже“ од препознатливото лого со четири прстени.
Погледот на официјалното соопштение открива дека ова не е Audi. Компанијата претстави нов бренд, а неговото име е - Audi. Поточно, сега е AUDI и токму тоа го пишува на концептите. Од сите имиња што можеле да ги изберат, се одлучиле за тоа име, а потоа ги тргнале прстените за да го оддалечат од истоимениот оригинал.
Новото лого сега е името на брендот, со големи букви. Концептите предводени од концептот AUDI E го откриваат ова. Токму тој најавува три нови модели, а тие ќе се нудат паралелно со моделите на Audi. Главната разлика ќе биде во тоа што Audi ќе нуди модели со класичен погон, додека AUDI ќе нуди исклучиво електрични автомобили.
Дополнително, сите модели на AUDI добиваат нов дизајнерски израз кој ќе биде „прилагоден на вкусот на кинеските клиенти“.
Герно Долнер, извршен директор на Audi, рече: „Со лансирањето на овој нов бренд за електрични и интелигентни модели во Кина, Audi пробива нови терени во нови сегменти со клиенти кои се технолошки понапредни“.
Концептот AUDI E е автомобил долг 4870 mm со Sportback карактер. Има два електромотори за погон на сите тркала. Официјалните податоци говорат за 570 kW и 800 nm и спринт до 100 км/час за 3,6 секунди. Досегот со батерија од 100 kWh е 700 км според стандардот CLTC.
Да потсетиме, претходно во Кина, Audi го оживеа култното име Horch на моделот A8L, што беше далеку пологично. Auto Union, NSU, DKW и Wanderer сè уште не се користат. Кој знае, можеби ќе заживеат во наредните години. Се разбира, под услов Audi да преживее.
