Авганистанската женска одбојкарска репрезентација се крие од талибанците, а една од спортиските беше убиена минатиот месец, изјавија две поранешни членки на тимот за BBC.
Речиси 30 одбојкарки се надеваат дека ќе побегнат од Авганистан, велејќи дека се плашат за нивните животи.
Дел од тимот се движи меѓу провинциите за да избегне откривање од талибанците откако милитантната група ја презеде контролата над Авганистан минатиот месец.
Захра Фајази пристигна во Велика Британија пред околу еден месец откако избега. Таа играше за авганистанската женска одбојкарска репрезентација седум години пред да премине на тренерската позиција.
Захра за BBC изјави дека еднa од репрезентативките е убиена, но во моментов нема повеќе детали за случајот.
„Не сакаме ова да им се случи на другите наши спортистки“, рече таа.
Захра уште е во контакт со нејзините поранешни соиграчки, од кои многу се во движење обидувајќи се да излезат од земјата.
„Нашите одбојкарки кои живееја во провинциите мораа да ги напуштат домовите и да се кријат на различни локации“, рече таа и продолжи:
„Тие дури и ја запалија спортската опрема за да се спасат себеси и своите семејства. Не сакаа да чуваат ништо поврзано со спортот. Се плашеа“.
Таа објасни дека жените кои спортуваат и живеат во провинција постојано добиваат закани од роднини и членови на семејството кои самите се талибанци или талибански следбеници.
„Талибанците побараа од семејствата на нашите спортистки да им забранат на своите ќерки да спортуваат, во спротивно ќе се соочат со насилство од невидени размери.“
Одбојката со децении е еден од најпопуларните спортови во Авганистан.
Првата женска репрезентација беше основана пред околу четири децении, но беше распуштена за време на првото владеење на талибанците од 1996 до 2001 година. Тимот беше повторно формиран откако талибанците беа соборени по американската инвазија.