Обдукцијата на телото на шведскиот диџеј Тим Берглинг, познат под уметничкото име Авичи, не покажа ништо сомнително во врска со неговата смрт, објави шведската телевизија SVT.
Полицијата во Оман направи две обдукции на телото на Авичи кој минатиот петок почина на 28-годишна возраст, додека беше на одмор во Мускат, престолнината на Оман.
Телевизијата објави дека обдукциите не покажале ништо сомнително и дека е исклучена можноста да се работи за убиство или самоубиство.
Се прават подготовки телото да биде пратено во Шведска, родната земја на Авичи.
Неговите обожаватели во Стокхолм во саботата одржаа едноминутно молчење за да му оддадат почит на починатиот диџеј.
Семејството на Авичи се заблагодари за поддршката и искажаната љубов и почит кон Берглинг и ја замоли јавноста да продолжи да ја почитува приватноста на членовите на семејството и пријателите во овие тешки мигови.
