Исландска авиокомпанија Wow Air е во потрага по двајца пријатели кои сакаат да патуваат по светот заедно ова лето. Нивната задача ќе биде да пишуваат блогови за искуствата кои ги доживеале, а за тоа секако ќе бидат и платени.
Нискобуџетната авиокомпанија овој оглас го објави на 23 април во кој стои дека тие се во потрага по „забавен пар кој има интересни идеи“.
Лицата кои ќе ја добијат оваа ,,работа“ ќе престојуваат во Исланд од први јуни до 15 август, додека заработката ќе им биде исплатувана месечно, а ќе живеат во апартман.
Тоа ќе им биде главната база за престој, а во меѓувреме ќе посетуваат многу дестинации ширум Европа и Северна Америка, а ќе го истражуваат и Исланд.
Исто така, ќе им биде дозволено и сами да си избираат дестинации кои сакаат да ги посетат, како Стокхолм, Барселона, Лос Анџелес или Њујорк.
Месечната заработка ќе изнесува 3.300 евра покрај веќе обезбедените сместување, превоз, како и туристички тури по Исланд.
Нивната задача ќе биде целата содржина која ќе ја направат (блогови, фотографии, гифови и останати објави) да ги споделуваат на интернет, но и на сајтот на авиокомпанијата.
Сите заинтересирани можат да се пријават, без разлика на тоа во кој дел на светот живеат.
Во пријавата е потребно да испратите и двеминутно видео, во кои давете совети и информации поврзани за вашиот град.
Можете да се пријавите до 14 мај, а четири дена подоцна компанијата ќе ги соопшти имињата на луѓето за кои се одлучиле.
