Вашингтон, 17 октомври 2018 (МИА) - Авионот на првата дама на САД Меланија Трамп принудно се врати на аеродромот откако полета бидејќи било забележано како излегува чад од леталото.
Новинарите присутни во авионот информираа дека причина за чадот бил „механички проблем“.
Како што јави CBS, авионот слетал во воената база од каде што полетал, а првата дама се чувствува добро.
Десет минути по полетувањето авионот почнал да остава трага од чад, а во него се чувствувал мирис на изгорено.
Американските медиуми јавија дека еден од членовите на екипажот пријавил „проблеми со комуникацискиот уред, кој се прегреал“, но Белата куќа не ги потврди овие наводи.
Меланија Трамп отпатува од Вашингтон за Филаделфија на средба со деца со синдром на неонатална апстиненција.
CBS јави дека првата дама на САД подоцна го продолжила патот кон Филаделфија со друг авион.